१५ असोज, काठमाडौं । रुसका विपक्षी नेता एलेक्सी नाभाल्नीले आफूलाई विष दिइनुमा राष्ट्रपति भ्लादिमिर पुटिनको हात रहेको बताएका छन् । एक जर्मन म्यागेजिनसँगको कुराकानीमा उनले गत अगष्ट महिनाको अन्तिममा उनलाई दिइएको विषबारे बाल्दै यस्तो बताएका छन् । उनले यो घटनाबाट पनि आफू विचलित भने नभएको बताएका छन् ।

गत अगष्टमा विष दिइएपछि नाभाल्नीलाई आन्तरिक विमानमार्फत् उपचारका लागि बर्लिन लगिएको थियो । जर्मनीमा डाक्टरहरुले नाभाल्नीलाई विष दिइएको कुराको पुष्टि गरेका थिए । सेप्टेम्बरमा उनलाई अस्पतालबाट डिस्चार्ज गरिएको थियो । म्यागाजिनसँगको कुराकानीमा उनले भने, ‘यो अपराधमा पुटिनको हात थियो भनेर म दाबीका साथ भन्न सक्छु र अरु के भएको थियो भनेरचाहिँ मलाई केही पनि थाहा छैन ।’

यो पनि पढ्नुहोस
अस्पतालबाट डिस्चार्ज भए विष दिइएका पुटिनका आलोचक

नाभाल्नीलाई विष दिइएको घटनाबारे पश्चिमा मुलुकहरुले विस्तृत जानकारी सार्वजनिक गर्न माग गरेका छन् । रुसले भने अहिलेसम्म यो घटना आपराधिक जस्तो नदेखिएको बताउँदै आएको छ ।

यो पनि पढ्नुहोस
रुसका विपक्षी नेता नाभाल्नीको बैंक खाता र सम्पत्ति रोक्का

नाभाल्नीले आफू पुनः रुस फर्किने बताएका छन् । उनले आफूलाई कुनै पनि डर नरहेको बताएका छन् । डाक्टरहरुले सामान्य अवस्थामा फर्किन नाभाल्नीलाई अझै एक महिना समय लाग्ने बताएका छन् ।

स्रोत  : अलजाजिरा